„Ég myndi segja að ég hafi haft allavega sex stjórnmálakonur mjög sterkt í huga, þverpólitískt frá vinstri til hægri. Þetta má ekki vera of einfalt, maður má ekki bara sigla í eina átt,“ segir leikkonan Halldóra Geirharðsdóttir, aðspurð hvort persóna hennar úr þáttaröðinni Föngum, Valgerður Þorvaldsdóttir, eigi sér einhverja fyrirmynd úr raunveruleika íslenskra stjórnmála.

Margir hafa velt fyrir sér og reynt að rýna í hver fyrirmyndin kunni að vera og ýmsar kenningar verið viðraðar á samfélagsmiðlum. Á það jafnt við um Valgerði sem aðrar persónur þáttanna sem virðast eiga ýmislegt sameiginlegt með fólki úr raunheimi. Halldóra segir þó að hún hafi tekið smávegis frá mörgum og brætt saman nýja persónu.

„Við Raggi [Ragnar Bragason leikstjóri] áttum þetta samtal lengi áður en við fórum í tökur. Hvaða litir eru þarna, hvernig er hárið og hvaða týpu við værum að púlla. Það eru mjög sterk element sem við þekkjum úr samtímanum sem koma fyrir í Valgerði. Það hefur kona farið í formannskjör, það er kona í flokknum sem spilaði handbolta, en þetta er ekki svo einfalt. Það væri ekki áhugavert fyrir mig sem leikkonu að vera bara með eina fyrirmynd.“

Halldóra, sem var gjörsamlega frábær í hlutverki sínu sem framagjarna stjórnmálakonan Valgerður í Föngum, segir að auk þess að hafa sex tilteknar stjórnmálakonur í huga við túlkun sína á Valgerði hafi hún einnig tekið ýmislegt frá karlmönnum líka.

„En þetta er örlítið leyndarmál og maður má ekki afhjúpa það. Ég má ekki segja frá, því þá ræni ég ykkur galdrinum og geri karakterinn of einfaldan,“ segir Halldóra létt í bragði.