Sænska ríkisútvarpið skýrir frá þessu. Fram kemur að Reza Ebrahimi hafi verið fundinn sekur um að hafa orðið eiginkonu sinni að bana með hníf. Að auki var hann fundinn sekur um að hafa beitt tvö af fjórum börnum þeirra hjóna ofbeldi.
Það var eitt barna þeirra hjóna sem hringdi í neyðarlínuna og tilkynnti um morðið en börnin höfðu reynt að stöðva atlögu föður síns. Í dómsorði er áhersla lögð á að morðið hafi verið hrottalegt og hafi verið framið fyrir framan börnin.
Við flutning málsins sagði saksóknari að það að morðið hafi verið framið fyrir framan börnin ætti að verða til refsiþyngingar og því væri rétt að krefjast lífstíðarfangelsis yfir Ebrahimi.
Ástæðan fyrir morðinu er að sögn saksóknara að konan vildi skilja við Ebrahimi. Hún hafði áður sagt yfirvöldum að hún hafi verið neydd til að giftast honum þegar hún var unglingur. Í febrúar á síðasta ári tilkynnti hún innflytjendayfirvöldum að hún vildi skilja við Ebrahimi.
Fyrir dómi sagði vinkona hennar að hin myrta hefði kynnst öðrum manni, sem hún hafi orðið ástfangin af, og þau hafi tekið upp ástarsamband. Hún hafi viljað fara frá Ebrahimi og „lifa frjáls eins og sænsk kona“ segir Aftonbladet að vinkonan hafi sagt fyrir dómi.
Fjölskyldan kom til Svíþjóðar 2016 og sótti um hæli. Síðan hafa yfirvöld margoft verið í sambandi við konuna og börnin sem sögðu að Ebrahimi hafi haft í hótunum við þau og hafi beitt þau ofbeldi.
