Auk þess að stunda leigumorð stundaði Fellows langhlaup af krafti. Það var einmitt hlaupaúrið hans sem varð honum að falli. Úrið safnaði nákvæmum upplýsingum um hvar hann var hverju sinni, púls hans og hlaupahraða. Þessi gögn reyndust einmitt skipta sköpum við rannsókn á morðunum á Paul Massey árið 2015 og John Kinsella á síðasta ári en þeir voru báðir þekktir afbrotamenn. Hann fékk 10.000 pund fyrir hvort morð en þau áttu rætur að rekja til átaka glæpagengja í Manchester á Englandi.
Fellows myrti þá báða eftir að hafa undirbúið sig mjög vel með því að fylgjast með þeim um langa hríð áður en hann lét til skara skríða og skaut þá til bana.
En það var einmitt þessi góði undirbúningur og hlaupaúrið sem urðu honum að falli. Þegar lögreglan gerði húsleit heima hjá honum á síðasta ári fann hún úrið. Við nánari skoðun á því var hægt að sjá nákvæmlega hvar Fellows hafði haldið sig hverju sinni þegar hann undirbjó morðið á Massey og hvar hann var þegar Massey var myrtur. Einnig var hægt að rekja flóttaleið Fellows frá vettvangi eftir úrinu.
Það sama á við um morðið á Kinsella, hlaupaúrið sagði lögreglunni alla söguna um hvernig Fellows undirbjó það og hver flóttaleið hans var.
Hann var dæmdur í lífstíðarfangelsi án möguleika á reynslulausn. Samverkamaður hans, Steven Boyle, var dæmdur í lífstíðarfangelsi með möguleika á reynslulausn eftir 33 ár.
