Jurgen Klopp, stjóri Liverpool, sá sína menn tapa 2-1 gegn Manchester City í kvöld og var þetta fyrsta tap liðsins á tímabilinu.
Klopp var ekki óánægður með spilamennsku sinna manna og segir að þeir hafi á tímum verið óheppnir.
,,Pressan var mikil í þessum leik en við vorum óheppnari en City myndi ég segja. Við vorum millimetrum frá því að skora,“ sagði Klopp.
,,Þeir áttu sín augnablik þar sem þeir voru með yfirhöndina í leiknum og allir fundu fyrir hversu erfiður leikur þetta var.“
,,Við komum til baka og fengum færi til að bæta við eins og þegar Ederson varði frábærlega frá Mohamed Salah, þú verður að skora í svona stöðu.“
,,Þetta var ekki okkar besti leikur og ekki besti leikur City. Þetta er hins vegar allt í lagi, við hefðum getað unnið eða gert jafntefli en við töpuðum, það er ekki stærsta vandamálið.“
Talað er um að Vincent Kompany hafi átt skilið að fá beint rautt spjald fyrir tæklingu á Salah í fyrri hálfleik og er Klopp undrandi á að spjaldið hafi verið gult.
,,Mér líkar mjög vel við Vincent Kompany en hvernig er þetta ekki rautt spjald?“
,,Ef hann fer aðeins meira í Mo þá væri hann meiddur út tímabilið. Hann gerði þetta því hann veit hversu snöggur Mo er.“
,,Þetta var ekki auðvelt fyrir dómarann og ég veit ekki hvort hann hafi séð brotið en ég sá þetta og sérstaklega eftir leikinn.“
