Það var fyrir um sjö vikum sem armenska Tamrazyan fjölskyldan, foreldrar og þrjú börn, leituðu skjóls í kirkjunni en til stóð að vísa fjölskyldunni úr landi en hælisumsókn hennar hafði verið hafnað. Um leið og fjölskyldan kom í kirkjuna hófst guðsþjónusta og stendur hún enn.
550 prestar, víða að úr Hollandi og frá ólíkum söfnuðum, skiptast á að annast helgihaldið allan sólarhringinn en það hefur staðið óslitið síðan í lok október og mun væntanlega halda áfram næstu vikurnar.
Ástæðan fyrir helgihaldinu er að sögn New York Times að samkvæmt hollenskum lögum er lögreglunni óheimilt að trufla guðsþjónustur og því getur hún ekki farið inn í kirkjuna til að sækja Tamrazyan fjölskylduna svo lengi sem guðsþjónusta stendur yfir.
Tamrazyan fjölskyldan flúði frá Armeníu 2010 af pólitískum ástæðum. Hún hefur búið í Katwijk, sunnan við Amsterdam, síðan. Tvisvar sinnum reyndu hollensk yfirvöld að neita fjölskyldunni um hæli en hún hafði betur í bæði skiptin. En yfirvöld gáfust ekki upp við að reyna að koma fjölskyldunni úr landi og unnu sigur í þriðju tilraun. Samkvæmt lögum frá 2013 á fjölskyldan að fá hæli í Hollandi þar sem börnin hafa búið í landinu í meira en fimm ár.
Talsmaður innanríkisráðuneytisins vildi ekki tjá sig um þetta einstaka mál en sagði að fjölskyldur fái aðeins hæli ef þær séu samstarfsfúsar.
Því heldur guðsþjónustan áfram og hefur að vonum vakið mikla athygli og hefur einhverskonar þjóðarhreyfing komist af stað um að halda henni gangandi. Kirkjan sér fjölskyldunni fyrir sálfræðiaðstoð og börnin, sem eru 15, 19 og 21 árs, fá kennslu þar sem þau geta ekki yfirgefið kirkjuna til að sækja skóla en þau stunda öll nám.