Ragga Nagli er klínískur heilsusálfræðingur og einkaþjálfari. Á Facebook heldur hún úti vinsælli síðu þar sem hún birtir reglulega pistla um hreyfingu, mataræði og fleira. Í þessum fjallar hún um af hverju við erum ekki komin lengra en umræðan í dag, þar á meðal Klaustursumræðan, sýnir.
Konur þurfa að brjóta mörg glerþök til að komast til metorða.
Rífa niður marga múra til að komast í valdastöður.Á leiðinni mætir þeim líka kaldur mótvindur.
Kona með skoðanir er tík.
Kona með áræðni er Gugga sem teymir menn á asnaeyrunum.
Kona með fötlun er spendýr í sjónum.
Kona sem sýnir tilfinningar er klikkuð kunta sem grenjar sig áfram.
Kona með völd er eins og ryðgað útigrill. Má muna sinn fífil fegurri.Fagleg afrek. Feminísk afrek. Akademísk afrek.
Það eru aukaatriði.Kona er smættuð niður í kynveru og básúnað óumbeðið álit um útlit og líkama.
Það eru skaðleg skilaboð til ungra kvenna að líkami og útlit sé það sem þær verða metnar að verðleikum í framtíðinni.
Ekki vitsmunirnir. Ekki metnaðurinn. Ekki dugnaðurinn.
Ekki þrautseigjan. Ekki árangurinn.Vorum við ekki komin lengra en þetta?
Hvaða líkamsímynd býr það til hjá óharðnaðri æsku ?
Að þung viðurlög séu við því að viðhalda ekki eilífum æskuljóma með húð eins og barnarass.
Sektaður fyrir að fella tár á almannafæri.
Jafnframt sé refsivert að vera fatlaður og samkynhneigður… og flest allt annað sem ekki er hvítur miðaldra karlmaður.Refsingin felst í að reisa um þig níðstöng í fjarvist þinni.
Kerfisbundið ofbeldi með orðum.
Blammeringar. Svívirðingar. Lítillækkun. Smánun. Niðurrif. Fyrirlitning.
Við kennum börnum að taka ábyrgð á eigin hegðun.
Að orð og gjörðir hafi afleiðingar.
Ljót orð um annað fólk meiði og særi tilfinningar.
Að orðin sem við veljum séu birtingarmynd hugsana okkar.
Að fordómar eigi aldrei rétt á sér.Hvaða skilaboð fá börn í dag frá valdamönnum þjóðarinnar um orð og afleiðingar?
Stundum er ekki nóg að segja bara „Sorrý.“
