Í dag verður demantur, sem nefnist „The Pink Legacy Diamond“ seldur á uppboði hjá Christie‘s í Genf í Sviss. Þessi demantur er ansi sérstakur, eiginlega alveg einstakur því hann er heil 19 karöt en flestir demantar eru 3 karöt og hugsanlega 5 ef heppnin er með, og bleikur. Það er ekki á allra færi að kaupa þennan demant en reiknað er með að hann verði seldur á 30 til 50 milljónir dollara en það svarar til 3,7 til 6,1 milljarða íslenskra króna.

Í fréttatilkynningu frá uppboðshúsinu er haft eftir Rahul Kadakia, sem er yfirmaður skartgripadeildar þess, að það sé alveg ótrúlegt að til sé demantur af þessari stærð með þessum lit. Bleiki liturinn sé til á demöntum sem eru ekki eins mörg karöt en að til sé bleikur demantur sem er næstum 19 karöt sé óraunverulegt.

„Demantar geta fengið þennan lit þegar nær ekkert köfnunarefni er. Tæplega tvö prósent demanta eru með þennan lit og þetta eru efnafræðilega hreinustu demantarnir, oft ótrúlega gegnsæir og með flottan gljáa.“

Er haft eftir Kadakia.

Demanturinn er flokkaður sem „Fancy Vivid“ en undir þann flokk falla aðeins 1 af hverjum 100.000 demöntum. Af þeim sökum er mikil eftirspurn eftir demöntum í þessum flokki og verðið er eftir því.

Á síðasta ári var bleikur demantur, sem er í Fancy Vivid flokknum, seldur á 32,5 milljónir dollara en sá demantur er tæplega 15 karöt. Þetta var hæsta verð sem hefur verið greitt fyrir bleikan demant.