Sædís Hrönn leitaði ráða hjá meðlimum í hópnum Matartips! á Facebook þar sem er að finna aragrúa af fróðum matgæðinum. Vandamálið sem Sædís glímdi við er eflaust vandamál sem margir hafa staðið frammi fyrir – að baka pítsu á pítsagrind úr IKEA og botninn á pítsunni festist við, sama hvort grindin er smurð eða dustuð með hveiti.
„Keypti svona pizzagrindur í IKEA um daginn en pizzan festist alltaf við grindina þótt ég noti fullt af hveiti/maískurli undir botnin. Get ég gert eitthvað svo þetta gerist ekki eða er þetta dauðadæmt?“ skrifaði Sædís.
Það stóð alls ekki á svörunum hjá Matartips-liðum, en margir hverjir voru með það alveg á hreinu hvernig á að forðast þetta vandamál.
„Henda grindunum á kolagrill og láta þær brenna duglega,“ skrifar inn tipsari, en einhverjir benda á að það sé líka hægt að brenna þær í ofni.
„Settu hana bara í ofninn og brenndu hana í klukkutíma. Mín var góð eftir það.“
Annað gott ráð sem matgæðingar hafa er að alls ekki þvo grindina fyrir eða eftir notkun. Einn Matartips-ari í raun fer yfir pítsugerðarferlið frá A til Ö fyrir Sædísi, og alla hina.
„Á fjórar svona grindur….. elska þær og nota á hverju einasta föstudagskvöldi. Til að byrja með má alls ekki þvo þær. Hvorki fyrir né eftir notkun. Fyrir fyrstu notkun hef ég sett þær inn í ofninn og látið þær hitna með ofninum. En baka pizzu alltaf á 250°c (ofninn kemst ekki hærra) og í neðstu grind. Fletur út degið og hefur vel af hveiti á því. Óþarfi samt að drekkja botninum í hveiti. Svo þarf að passa þegar degið er sett á að það komi hvergi gat, þá getur botninn fest við. Þegar pizzan er tilbúin er gott að banka henni létt í borðið þegar hún er tekin út og þá rennur hún ljúft af.“
Einhverjir hafa haldið því fram í færslunni að nauðsynlegt sé að nota smjörpappír til að baka pítsuna. Það er algengur misskilningur eins og einn tipsari bendir á.
„Ef þú notar smjörpappir þá er tilgangurinn með grindinni farinn. Hitinn á að fara beint á botninn eins og á pizzastöðunum.“
Þá vitum við það! Takk Matartips!