Rökstuddur grunur er um að upptök eldsvoðans á Selfossi í gær hafi verið af mannavöldum. Tveir létust í brunanum sem varð í einbýlishúsi á Kirkjuvegi. Í tilkynningu sem lögregla sendi frá sér í dag kemur fram að búið sé að flytja líkamsleifar þeirra sem létust af vettvangi og er krufningar nú beðið.

Tæknideild lögreglunnar á höfuðborgarsvæðinu vinnur að vettvangsrannsókn ásamt sérfræðingum Mannvirkjastofnunar. Búið er að taka skýrslu af öðrum þeirra sem er í haldi lögreglu vegna brunans og skýrslutökur yfir hinum aðilanum standa yfir.  Þá segir lögregla að gera megi ráð fyrir að báðir aðilarnir verði leiddir fyrir dómara síðar í dag og gæsluvarðhalds krafist yfir þeim í þágu rannsóknar málsins.