Matgæðingurinn landsþekkti, Nanna Rögnvaldardóttir, gaf nýverið út bókina Beint í ofninn. Í bókinni eru meðal annars góð ráð fyrir fólk til að sporna gegn matarsóun. Hér deilir Nanna nokkrum af þeim ráðum.
Það er alltaf gott að skipuleggja innkaupin og skoða hvað til er heima áður en farið er í búðina svo að maður endi ekki með fjórar opnar pestókrukkur í ísskápnum eða marga bakka af kryddjurtum sem bara hafa verið tekin nokkur blöð úr.
Kaupa ekki of mikið í einu – það getur verið hagstætt að kaupa ýmislegt í stórum pakkningum en sá ágóði er fljótur að fara ef maður þarf svo að henda hluta af vörunni.
Skoða dagstimpla í búðinni en rígbinda sig ekkert endilega við þá þegar heim er komið – óopnuð krukka eða pakki getur vel enst marga mánuði fram yfir dagsetninguna á umbúðunum, maður metur það bara fyrir sig.
Kynna sér hvernig best er að geyma, til dæmis grænmeti og ávexti, sumt á að vera í ísskáp, annað helst ekki – og ekkert endilega henda einhverju sem er farið að láta aðeins á sjá, það þarf alls ekki að vera verra á bragðið. Skoða reglulega hvað er í grænmetisskúffunni og miða kannski matseðil næstu daga að einhverju leyti við það sem þar er.
