„Það er löngu kominn tími til að þjóðir heims vakni og átti sig á því að stefnan sem fylgt hefur verið á þessu sviði er bara eins konar helstefna með glæpum og mannfórnum sem unnt er að draga úr svo um munar.segir Jón Steinar Gunnlaugsson lögmaður og fyrrverandi Hæstaréttardómari. Í pistli sem birtist á vef Pressunnar telur hann upp atriði sem mæla með lögleiðingu fíkniefna og segir margs konar böl fylgja opinberri bannstefnu gegn efnunum.

Jón Steinar segir gríðarlegan fjölda fólks hafa látið lífið í stríðinu við fíkniefnadjöfulinn, þar á meðal fólks sem ekki hafi verið sjálfviljugir þáttakendur.

„Rannsóknir sýna að miklu fleiri láta lífið í þessu stríði heldur en myndu verða fíkniefnunum sjálfum að bráð ef þau yrðu einfaldlega leyfð eins og áfengi. Og margs konar annað böl fylgir þessari opinberu bannstefnu gegn fíkniefnunum.
Haldið er lífi í undirheimum þar sem glæpir þrífast og löggæslan ræður ekkert við. Ungmenni sem leiðast út í neyslu verða fórnarlömb glæpamanna.

Þau fjármagna neysluna með glæpum og vændi. Efnin sem dreift er geta verið stórhættuleg meðal annars vegna þess að stundum er reynt að drýgja þau með íblöndun annarra efna. Og árangurinn af þessari skelfilegu stefnu er auðvitað enginn. Efnin flæða yfir á Vesturlöndum sem aldrei fyrr og yfirvöldin ráða ekkert við vandann.“

Þá segir Jón Steinar að þjóðir heims ættu að taka sig saman um og aflétta bannstefnu gegn fíkniefnum. „Það ætti hreinlega að leyfa að minnsta kosti flestar tegundir fíkniefna. Efnin yrðu þá framleidd undir vörumerkjum og dreift á almennum markaði eins og áfengið,“ segir hann og bætir við að mynda kippa fótunum undan afleiddri glæpastarfsemi.