Þjóðin syrgir nú Stefán Karl Stefánsson leikara. Greint var frá því í gær að Stefán Karl væri látinn eftir tveggja ára baráttu við krabbamein sem hann greindist með árið 2016.

Stefáns Karls verður minnst sem einn hæfileikaríkasti leikari sem þjóðin hefur átt. Þá var Stefán Karl með hjarta úr gulli og lét hann gott af sér leiða á ýmsum sviðum.

Undanfarinn sólarhring hafa ótalmargir Íslendingar minnst Stefáns Karls á samfélagsmiðlum og sömuleiðis hafa fjölmiðlar víða um heim greint frá andláti hans. Einnig syrgja ótal erlendir aðdáendur Stefán.

Stefán Karl var fæddur í Hafnarfirði árið 1975 og steig sín fyrstu skref í leiklistinni hjá Leikfélagi Hafnarfjarðar. Eftir útskrift frá Leiklistarskóla Íslands árið 1999 fór hann með fjölda burðarhlutverka á sviði, í kvikmyndum og í sjónvarpsþáttum.

Hann vann síðan hug og hjörtu barna um allan heim þegar hann fór með hlutverk Glanna Glæps, skúrksins alræmda í sjónvarpsþáttunum um Latabæ. Þá sló hann í gegn sem Trölli í söngleiknum Þegar Trölli stal jólunum, en sýningin var sett upp víða um Bandaríkin og fór Stefán með hlutverkið í níu ár. Stefán lék einnig í bíómyndum, þáttum og kom að ótal leiksýningum.

Af gefnu tilefni tók DV saman örfá brot frá ferli þessa ástsæla leikara og skemmtikrafts sem kvaddi heiminn alltof snemma.