Klukkan 12 á hádegi byrjar fremur óvenjulegt 24 klukkustunda maraþon en þá ætlar Lilja Katrín Gunnarsdóttir, eigandi og yfirbakari hjá Blaka, að baka í sólarhring samfleytt á heimili sínu í Kópavogi til styrktar Krafti, stuðningsfélagi fyrir ungt fólk sem hefur greinst með krabbamein og aðstandenda þeirra.

Bakar til styrktar Krafti

Líkt og áður segir byrjar maraþonið klukkan 12 á hádegi laugardaginn 17. september en þá fer fyrsta kakan inn í ofn. Síðasta kakan fer inn í ofn akkúrat sólarhring síðar, eða klukkan 12 á hádegi sunnudaginn 18. september.

„Á þessum sólarhring, og eitthvað fram eftir sunnudeginum, eru allir velkomnir í kaffi og með’í á heimili mínu í Melgerði 21 í Kópavogi. Þá getur fólk gúffað í sig af vild en í staðinn fyrir að borga fyrir kræsingarnar er fólk hvatt til að styrkja Kraft, á staðnum eða leggja inn á bankareikning félagsins. Það er þó alls engin skylda en ég verð með sérstaka styrktarbauka í kaffisamsætinu. Og auðvitað rennur allur ágóði til Krafts,“ segir Lilja Katrín í tengslum við þennan frábæra viðburð.

Lilja Katrín verður með styrktaraðila á bak við sig en þeir sem leggja til vörur eru Lífland, Nesbú, Katla, Royal, Góa, MS, Ölgerðin og Krónan.

Einnig verður hægt að fylgjast með herlegheitunum á Facebook- og Instagram-síðu Blaka, sem og á Snapchatti Lilju en notendanafnið hennar er liljagunn.

Þetta verður megastuð

Þá ætlar Lilja Katrín að setja allar uppskriftirnar sem hún bakar í maraþoninu inn á blaka.is, þegar tími gefst.

„Þetta er vissulega maraþon í óhefðbundnari kantinum og kannski á ég eftir að sofna með andlitið ofan í smjörkremi en eitt veit ég fyrir víst – þetta verður mega stuð,“ segir Lilja Katrín og bætir við:

„Þannig að endilega sýnið ykkur og sjáið aðra, hóið vinahópnum saman eða fjölskyldunni og kíkið í kaffi til mín og styrkið gott málefni í leiðinni. Ég lofa að það verður nóg af rjóma og nóg af súkkulaðisyndum og að andrúmsloftið verður kolvetnaþrungið.“