Nígería 2-0 Ísland
1-0 Ahmed Musa(48′)
2-0 Ahmed Musa(75′)

Íslenska karlalandsliðið þurfti að sætta sig við tap gegn Nígeríu í dag er liðin áttust við í riðlakeppni HM.

Ísland átti fínan leik í fyrri hálfleik og var sterkari aðilinn en tókst þó ekki að skora og staðan markalaus eftir fyrstu 45.

Í síðari hálfleik tóku Nígeríumenn forystu er Ahmed Musa skoraði eftir aðeins þrjár mínútur eftir fína sókn.

Musa bætti svo við öðru marki á 75. mínútu leiksins en hann fór þá illa með vörn Íslands og setti boltann í netið.

Gylfi Þór Sigurðsson gat minnkað muninn úr vítaspyrnu á 83. mínútu eftir að brotið hafði verið á Alfreði Finnbogasyni.

Gylfi klikkaði hins vegar á punktinum og setti boltann yfir markið og tókst strákunum ekki að koma inn marki í 2-0 tapi.