Þingflokkur Sjálfstæðisflokksins styður ekki fjármálaáætlun ríkisstjórnarinnar að óbreyttu. Skiptir þar mestu áætluð hækkun á virðisaukaskatti á ferðaþjónustuna úr 11% í 22,5% á næsta ári. Greint er frá þessu í Morgunblaðinu í dag.

Í síðustu viku var greindi RÚV frá því að meirihluti fjárlaganefndar hafi lagt það til að fresta ætti hækkuninni á ferðaþjónustuna til ársins 2019 og í staðinn ætti að skoða komugjöld.

Haft var eftir Benedikt Jóhannessyni fjármála- og efnahagsráðherra og formanni Viðreisnar í þættinum Eyjunni í lok apríl síðastliðnum að það kæmi ekki til greina að breyta þessum áformum, ákvörðunin um að hækka virðisaukaskattinn stæði. Ítrekaði Benedikt skoðun sína í Kastljósi í gærkvöldi, sagði hann róttækar lausnir vera það eina í stöðunni til að sporna gegn sterku gengi krónunnar. Var hann ekki hrifinn af komugjöldum, þau öfluðu ekki nægra tekna og væru landsbyggðarskattur.