Þorsteinn Víglundsson félags- og jafnréttismálaráðherra segir taumlaus vöxtur ferðaþjónustu hér á landi sé ekki eftirsóknarvert og efast hann um að hækkun á virðisaukaskatti í greininni muni setja hana á hliðina.

Á Fésbókarsíðu sinni birtir Þorsteinn línurit yfir verðþróun á gistingu frá árinu 2010 sem hefur tvöfaldast á 7 árum:

Í stuttu máli hefur verðið lið­lega tvö­fald­ast á sama tíma og almennt verð­lag hefur hækkað um 23%. Á sama tíma hefur nýt­ing­ar­hlut­fall gisti­rýma auk­ist jafnt og þétt,

segir Þorsteinn. Þegar litið sé á þessar tölur þá séu hamfara spár ekki trúverðugar, en slíkar spár komi ekki á óvart því sjaldgæft sé að atvinnugreinar taki skattahækkunum fagnandi. Segir Þorsteinn tilgang skattahækkananna tvíþættann:

„Í fyrsta lagi að hemja þann stjórn­lausa vöxt sem verið hefur í ferða­þjón­ustu á und­an­förnum miss­erum, Í öðru lagi að lækka almenna þrep virð­is­auka­skatts­ins sem þýðir að allur almenn­ingur mun borga aðeins lægri virð­is­auka en ferða­menn aðeins hærri. Þannig nýtur þá almenn­ingur þess upp­gangs sem verið hefur í þess­ari mik­il­vægu atvinnu­grein.“

Segir Þorsteinn að horfa verði til samfélagslegra þolmarka ekki síður en efnahagslegra áhrifa sem vöxtur ferðaþjónustunnar hefur haft undanfarin ár:

Taumlaus vöxtur ferðaþjónustu er ekki eftirsóknarverður. Í flestum greiningum sem unnar hafa verið á vegum greinarinnar sjálfrar hefur raunar ítrekað verið varað við áherslu á mikla fjölgun ferðamanna. Mikilvægara sé að horfa til aðgangsstýringar og virðisauka.