Jón Gunnarsson samgönguráðherra vonast til að hægt verði að hefjast handa við að reisa nýja flugstöð í Vatnsmýri á næsta ári, vill hann að Reykjavíkurflugvöllur verði áfram á sama stað og nú. Greint er frá þessu í Morgunblaðinu í dag. Hyggst ráðherra skipa nýjan starfshóp til að meta flugvallarkosti fyrir innanlandsflug.
Mun hópurinn vinna með niðurstöðu Rögnunefndarinnar sem komst að þeirri niðurstöðu árið 2015 að Hvassahraun væri besti kosturinn fyrir staðsetningu á flugvelli, en nefndin kannaði ekki kosti þess að hafa flugvöllinn áfram í Vatnsmýrinni. Í nýja hópnum verða sem fyrr fulltrúar ríkisins, Reykjavíkurborgar og Icelandair, en einnig fulltrúar landsbyggðarinnar.
Það er í mínum huga mikilvægt að hefja sómasamlega uppbyggingu á aðstöðu fyrir farþega og starfsmenn í Vatnsmýri,
sagði Jón í samtali við Morgunblaðið. Ólafur Þór Ólafsson formaður Svæðisskipulags Suðurnesja segir að Hvassahraun henti ekki undir flugvöll þar sem svæðið sé helsta vatnsverndarsvæði Suðurnesja, telur ráðherra að það þurfi að skoðast betur, langt sé í að annar flugvöllur verði byggður og fljótlega komi út skýrsla sem hann hafi látið vinna um öryggishlutverk Reykjavíkurflugvallar.
Air Iceland Connect, áður Flugfélag Íslands, hefur þegar látið teikna nýja flugstöð í Vatnsmýri sem yrði á sama stað og sú sem er nú.
