Fram kemur í svari Óttars Proppe heilbirgðisráðherra á Alþingi við fyrirspurn Björns Leví Gunnarssonar að 18.852 einstaklingar greiddu á síðasta ári meira en 80.000 krónur vegna meðferðar þeirra í heilbrigðiskerfinu og var meðalkostnaður þeirra 114.000 krónur. Samanlagður hlutur þeirra var 2,3 milljarðar króna. Eru þá lyfjakaup ekki meðtalin. Með nýju greiðsluþátttökukerfi sem tók gildi um síðustu mánaðamót verður hámarksgjald innan almanaksmánaðar 24.600 kr hjá almennum sjúkratryggðum einstaklingu en 16.400 krónur hjá öðrum. Í svarinu segir svo:
„Það leiðir til þess að enginn almennur sjúkratryggður greiðir meira en sem nemur 69.700 kr. á 12 mánaða tímabili ef tímabilið hefst án stöðu á afsláttarstofni og 49.200 kr. á ári ef tímabilið hefst á fullum afsláttarstofni, sem er hámark fyrir þá sem þurfa samfellda þjónustu. Hámarkskostnaður annarra yrði þá 46.467 kr. og 32.800 kr. miðað við sömu forsendur. Að auki er gert ráð fyrir gjaldfrjálsri þjónustu sjálfstætt starfandi sérfræðinga við börn sem fengið hafa tilvísun frá heimilislækni. Gert er ráð fyrir að margar barnafjölskyldur muni nýta sér það úrræði.“
