Eigið fé sjávarútvegsfyrirtækja í lok árs 2015 er ekkert þegar eignfært verðmæti fiskveiðikvóta hefur verið dregið frá. Þetta kemur fram í skýrslu Hagstofu Íslands um rekstur og efnahag fyrirtækja 2015. Þar kemur fram að eigið fé í sjávarútvegi hafi verið í árslok 2015 samtals 254 milljarðar króna. Þar af eru bókfærðar óefnislegar eignir 255 milljarðar króna. Segir í skýrslunni að þessar eignir séu um 40% af heildareignum í sjávarútvegi og að stærstum hluta sé um að ræða eignfærðar veiðiheimildir. Frá 2002 hefur hlutdeild óefnislegra eigna af eignum í sjávarútvegi tvöfaldast.
Eins og kunnugt er er óheimilt lögum samkvæmt að veðsetja veiðiheimildirnar sem eru skilgreindar sem þjóðareign. Frá 2002 til 2015 hefur uppsöfnaður hagnaður fyrir skatta og fjármagnsliði (EBIT) verið samtals um 697 milljarðar króna á verðlagi ársins 2015 að því er fram kemur í skýrslunni. Þar af eru 382 milljarðar króna frá 2010 til 2015. Í lok árs 2001 var eigið fé í sjávarútvegi 60 milljarðar króna, sem jafngildir 116 milljörðum króna í lok árs 2015. Eigið fé atvinnugreinarinnar hefur því aðeins aukist um 140 milljarða króna frá 2002 til 2015 þrátt fyrir 700 milljarða króna uppsafnaðan hagnað fyrir skatta og fjármagnsliði. Mismunurinn nemur 560 milljörðum króna. Heiðrún Lind Marteinsdóttir, framkvæmdastjóri samtaka fyrirtækja í sjávarútvegi sagði á ársfundi samtakanna í síðustu viku að fjárfestingar í sjávarútvegi frá 2009 til 2015 hafi numið um 100 milljörðum króna.
87 milljarðar í ferðaþjónustu
Til samanburðar er eigið fé í ferðaþjónustu 87 milljarðar króna þegar frá hafa verið dregnir 4 milljarða króna óefnislegar eignir samkvæmt því sem fram kemur í skýrslu Hagstofu Íslands. Launakostnaður í ferðaþjónustu var líka meiri árið 2015 en í sjávarútvegi. Hann var 102 milljarðar króna í ferðaþjónustu en 96 milljarðar króna í sjávarútvegi. Frá 2009 hefur launakostnaður í ferðaþjónustu aukist um 51 milljarð króna, sem er tvöföldun en hækkað um 19% á sama tíma í sjávarútvegi. Árið 2015 voru arðgreiðslur 15 milljarðar króna í sjávarútvegi og 11 milljarðar króna í ferðaþjónustu.
