Marta Guðjónsdóttir borgarfulltrúi Sjálfstæðisflokks vandar Gísla Marteini Baldurssyni fyrrum borgarfulltrúi ekki kveðjurnar í opnu bréfi en hann hefur gagnrýnt flokkinn fyrir stefnubreytingu í skipulagsmálum og sakað fulltrúa hans um lýðskrum. Á Reykjavíkurþingi Sjálfstæðisflokksins fyrir skömmu var samþykkt að endurskoða skyldi aðalskipulag Reykjavíkur tafarlaust og hefja leit að nýjum byggingarsvæðum.
Á bloggsíðu Gísla Marteins segir hann að það sé „algjört glapræði fyrir borgarstjórn“ að byggja ný hverfi utan núverandi byggðar. Þessu er Marta ósammála og skrifar af því tilefni opið bréf til Gísla Marteins sem birtist í dag á Vísi og segir að sér þyki hann:
Því miður hafa álpast út í forarpytt forsjárhyggju og útópískrar heildarhyggju sem lítur á borgina sem Legókubba. Borgin er ekki leikfang né viðfang tískuskoðanna. Reykvíkingar eru ekki Legókarlar og kerlingar með málað bros á ljósbrúnni kúlu sem þú getur fært frá einum stað til annars.
Marta segist lengi hafa verið ósammála Gísla um flest hvað varðar skipulagsmál. Hún hafnar þeirri fullyrðingu að Sjálfstæðismenn í Reykjavík berjist fyrir dreifingu byggðar vítt og breitt um Reykjavíkursvæðið. Sjálfstæðisflokkurinn vilji þétta byggð en ekki bara til þess að þétta byggð.
Að sögn Mörtu er það aðalskipulag sem nú er í gildi „blind trúarsannfæring sem vinnur gegn eigin markmiðum.“ Núverandi meirihluti, með Dag B. Eggertsson borgarstjóra í broddi fylkingar sé ekki að því heldur vinni að því að dreifa byggð eins og fremst er kostur og á árunum 2013-2017 hafi sjö af hverjum tíu nýjum íbúum á höfuðborgarsvæðinu verið skráðir í annað sveitarfélag en Reykjavík.
Er þetta “umhverfisvænt” og “ódýrt” eða er þetta kannski “útþenslustefnan” sem þú ert andvígur? Þarftu ekki að skoða heildarmyndina?
spyr Marta.
Hún segir ekkert mið tekið af örum framförum í tækni, einkum hvað varði einkabílinn í skipulagshugmyndum meirihlutans og Gísla Marteins. Samgöngur séu mikilvægur þáttur í lífi fólks og þær verði að vera greiðar og „Þetta vita best hershöfðingjar sem eru sérfræðingar í því að lama samfélög óvinarins. Þeir leggja áherslu á að sprengja upp brýr og flugvelli og hefta allar samgöngur.“
Lýkur Marta bréfinu á þeim orðum að hún velkist ekki í vafa um það að jafn glaðlyndur maður og Gísli Marteinn vilji samfélaginu allt það besta en engu að síður sé hann á villigötum. Hann hafi snúið bakinu við frjálshyggjunni sem hann aðhylltist á yngri árum og þann kjarna Sjálfstæðisstefnunnar að einstaklingar viti sjálfir hvað þeim er fyrir bestu.
