Í Staksteinum í Morgunblaðinu eru fjölmiðlar gagnrýndir fyrir umfjallanir um einkalíf Sigmundar Davíðs og Bjarna Benediktssonar forsætisráðherra. Á meðan hjólað sé á ósanngjarnan hátt í þessa tvo stjórnmálamenn sé farið silkihöndum um aðra og er Rósa B. Brynjólfsdóttir, þingmaður Vg, sérstaklega nefnd í því samhengi. Staksteinar Morgunblaðsins byrja á þessum orðum:

„Pál Vilhjálmsson bendir á. Einkalíf Sigmundar Davíðs var pólitískt hitamál, þar sem eiginkonu hans tæmdist arfur. Einkalíf Bjarna Ben. var gert að stórmáli með fréttum um að faðir hans hafði skrifað undir hjá manni sem sóttist eftir uppreisn æru.“

Maðurinn sem ekki er nefndur á nafn heitir Hjalti Sigurjón Hauksson. Hann er barnaníðingur. Hann misnotaði barn yfir 12 ára tímabil fyrir nær dagleg hrottaleg kynferðisbrot. Hjalti þessi fékk uppreist æru. Faðir Bjarna Benediktssonar skrifaði upp á uppreist æru. Hjalti var heimsóttur í fangelsi af föður forsætisráðherra og þá starfaði barnaníðingurinn í fyrirtæki Engeyjarfjölskyldunnar. Framkvæmdastjóri skrifaði uppá uppreist æru, en hann sagðist ekki hafa vitað að um væri að ræða bréf í tengslum við uppreist æru heldur meðmælabréf fyrir vinnu, og þá lagði stjórn Kynnisferða hart að framkvæmdastjóranum að ráða hann í vinnu. Þá sagði Sveinn Eyjólfur Matthíasson, fyrrverandi næsti yfirmaður Hjalta hjá Kynnisferðum í yfirlýsingu sem hann sendi öllum fjölmiðlum að yfirmenn sínir og eigendur Kynnisferða hafi þrýst á sig að greiða veg fyrir Hjalta. Yfirmenn hans sem sátu í stjórn voru flestir ættingjar Bjarna og Benedikts. Það má fær rök fyrir því að tvö bréf af þremur sem urðu til þess að æra Hjalta var uppreist hafi tengst fyrirtæki fjölskyldu Benedikts. Þá hefur ekki verið fyllilega skýrt hver tengsl Hjalta við Benedikt eru. Benedikt hefur sagt að Hjalti hafi verið tengdur enn kunningjafólki þeirra hjóna meðan Hjalti hefur sagt þá nána vini. Þá hefur verið greint frá því að Benedikt hafi heimsótt Hjalta í fangelsi. Enn stendur uppi sú spurning hvernig vinskapur á milli kaupsýslumanns frá Garðabæ fæddum árið 1938 við rútubílstjóra fæddum 1960 hófst. En vegna þessa manns, samband Hjalta og Benedikts og þess að Bjarni Ben greindi ekki frá að faðir hans hafði kvittað uppá hjá manni sem braut skelfilega á barni í meira en áratug féll ríkisstjórnin. Höfundi Staksteina finnst það ekki fréttnæmt. Þetta sé einkalíf sem gert sé að stórmáli. En þá aftur að umfjöllun Staksteina, nú þegar búið er að greina frá hver maðurinn er sem sótti um uppreist æru. Í Staksteinum segir:

„Þegar sá orðvari nýþingmaður Helga Vala Helgadóttir talar um „jakkið“ á hún við aursletturnar sem hún og samherjar hennar köstuðu að Sigmundi Davíð og Bjarna Ben.“

Þá beinir höfundur Staksteina spjótum sínum að Rósu B. Brynjólfsdóttur þingmanni Vg. Segir að hún sé leiðandi í þeirri kröfu að Vg starfi frekar með Samfylkingunni.

„Á vef Alþingis segir að hún sé í hjónabandi með fyrrverandi framkvæmdastjóra Samfylkingar, Kristjáni Guy Burgess. Rósa B. er ekki þýfguð um það hvort sambúð með innvígðum og innmúruðum samfylkingarmanni hafi áhrif á pólitískt mat hennar,“ segir höfundur og bætir við: „Ekki grennslast fjölmiðlar fyrir um hvort enn sé ráðningarsamband milli Kristjáns og Samfylkingar. Einkalíf Rósu B. er ekki til umræðu á samfélagsmiðlum eða í fréttum.“

Þá enda Staksteinar á þessum orðum:

„Nærfærnin sem Rósa B. nýtur sýnir hve háttvísir fjölmiðlar eru – þegar kemur að öðrum en Sigmundi Davíð og Bjarna Benediktssyni.“