Forystumenn stjórnmálaflokkanna munu ræðast við áfram í dag og verður áhersla Bjarna Benediktssonar, formanns Sjálfstæðisflokksins, eflaust að tala við Katrínu Jakobsdóttur, formann VG og Sigurð Inga Jóhannsson, formann Framsóknar. Talið er að Bjarni fái stjórnarmyndunarumboðið í dag eða á morgun en hann hefur sjálfur sagt að hann telji það eðlilegast miðað við stöðuna. Sigmundur Davíð Gunnlaugsson gagnrýndi Sigurð Inga Jóhannsson í gær bæði á RÚV og Vísi, aðallega fyrir að vilja mynda ríkisstjórn með breiða skírskotun, með VG og Sjálfstæðisflokknum, í stað þess að byggja þá ríkisstjórn á „grundvelli málefnanna“. Sigmundur útilokar þó ekki samstarf með Framsókn og þá VG og Sjálfstæðisflokknum, en óvíst er að Bjarni Benediktsson vilji fara í  samstarf með Sigmundi í fjögurra flokka stjórn. Bjarni er sagður tilbúinn að láta Katrínu Jakobsdóttur eftir forsætisráðuneytið, gegn því að fá meirihluta ráðherrastóla, en sú niðurstaða að Katrín fái forsætisráðuneytið er sögð muni höfða til þingheims, sem telji Bjarna of umdeildan til að ná sáttum þvert yfir línuna.

Ljóst er þó að Sigurður Ingi er einnig í sterkri stöðu gagnvart VG og Sjálfstæðisflokknum. Hann mun vafalaust gera Framsóknarflokkinn út sem „límið“ í mögulegri stjórn og að hann sem forsætisráðherra sé brúin milli hinna ólíku póla vinstri og hægri pólitíkur. Þá er ekki útilokað að samið verði um stólaskipti á miðju tímabili þar sem Katrín eða Bjarni fengi hásætið, en slíkar getgátur eru ótímabærar og heimildamenn Eyjunnar vilja lítið gefa fyrir slíkar vangaveltur.