Magnús Óli Ólafsson, formaður Félags atvinnurekenda, hefur skrifað bréf til forystumanna allra þeirra stjórnmálaflokka sem náðu kjöri á Alþingi í nýafstöðnum kosningum. Þar vekur hann athygli á nokkrum hagsmunamálum atvinnulífsins sem hann telur að eigi heima í stjórnarsáttmála nýrrar ríkisstjórnar.

„Félagi atvinnurekenda þykir mikilvægt að í nýjum stjórnarsáttmála verði tekið á ýmsum atriðum sem varða hagsmuni fyrirtækjanna í landinu, ekki síst þeirra minni og meðalstóru. Þau fyrirtæki eru hryggjarstykkið í íslensku atvinnulífi og öflugt atvinnulíf er undirstaða velferðarinnar sem við viljum öll tryggja,“ segir í bréfi Magnúsar til flokksformanna.
Magnús bendir meðal annars á að mikilvægt sé að sýna aðhald og ábyrgð í ríkisfjármálum til að styðja við peningamálastefnu Seðlabankans. „Stöðugleiki, þar sem verðbólgumarkmið nást og vextir halda áfram að lækka, er stærsta hagsmunamál fyrirtækjanna,“ segir hann og bætir við að haldið verði áfram að lækka tryggingargjald fyrirtækja í áföngum.

Þá vill hann að átak verði gert í því að einfalda regluverk atvinnulífsins og hrinda í framkvæmd áformum um að tilkynningaskylda fyrirtækja komi í stað flókinna og dýrra leyfisveitinga.

„FA leggur áherslu á að fylgt verði eftir tillögum í nýlegri skýrslu utanríkisráðuneytisins um að komið verði upp verklagi þar sem tilgreint verði í greinargerðum með frumvörpum til innleiðingar EES-reglna hvaða ákvæði varði reglurnar beinlínis, hvaða ákvæði gangi lengra en þær kveða á um og þá af hvaða ástæðum og hvaða svigrúm sé til að haga innleiðingu þannig að hún verði minna íþyngjandi fyrir atvinnulífið.“

Þá verði haldið áfram að einfalda virðisaukaskattskerfið. Fækka ætti undanþágum, breikka skattstofninn og leggja á virðisaukaskatt í einu þrepi sem yrði mun lægra en efra þrep skattsins í dag. Þá verði eftirlitsgjöld sem ríkið leggur á fyrirtæki tekin til heildarendurskoðunar með það að markmiði að þau endurspegli ævinlega raunkostnað við eftirlitið og stuðli að kostnaðaraðhaldi hjá eftirlitsstofnunum. „Fyrir liggur skýrsla FA frá því fyrr á árinu, sem verið getur leiðarvísir stjórnvalda um tiltekt í eftirlitsgjöldum.“
Þá hvetur Magnús til endurskoðunar búvörusamninga og þeirri vinnu verði lokið í breiðri sátt bænda, neytenda og atvinnulífs. Stuðningskerfi landbúnaðarins verði breytt og tollar lækkaðir í samræmi við tillögur Samráðsvettvangs um aukna hagsæld.
„Leitað verði leiða til að tryggja aðgengi fiskvinnslu án kvóta eða eigin útgerðar að hráefni til vinnslu. Ný ríkisstjórn ætti að skuldbinda sig til að hrinda í framkvæmd tilmælum Samkeppniseftirlitsins frá 2012, um afnám samkeppnishindrana í sjávarútvegi.“
Þá verði gert átak í því að ríkisstofnanir fari að lögum um opinber innkaup og bjóði út kaup á vörum og þjónustu.
„Stjórnvöld fari að tilmælum Samkeppniseftirlitsins um að afnema samkeppnishömlur, til dæmis í landbúnaði, sjávarútvegi og millilandaflugi. Taka ætti upp samkeppnismat á allri löggjöf sem varðar atvinnulífið eins og OECD hefur lagt til.
Hömlur verði settar á samkeppni ríkisfyrirtækja á borð við Isavia og Íslandspóst við einkarekin fyrirtæki.
Átak verði gert í gerð fríverslunarsamninga við önnur ríki, ýmist tvíhliða eða á vettvangi EFTA, og sérstaklega gætt að hagsmunum íslenskra fyrirtækja vegna útgöngu Bretlands úr Evrópusambandinu.“