Samkvæmt nýju fjárlagafrumvarpi verða framlög til heilbrigðismála aukin um 21.5 milljarð króna. Heilbrigðisráðherra leggur áherslu á jafnt aðgengi allra að heilbrigðisþjónustu, óháð efnahag og búsetu. Þetta kemur fram í tilkynningu frá ráðuneytinu. Þetta er hinsvegar á skjön við væntingar forstjóra heilbrigðisstjórnenda á landsbyggðinni, sem margir hverjir eru ósáttir við að bera skarðan hlut frá borði, en til dæmis þá er sett hagræðingakrafa á heilbrigðisstofnun Norðurlands, líkt og fram hefur komið á Eyjunni. Þá virðist sem að viðbótarfé renni mest til Landspítalans, heilsugæslunnar á höfuðborgarsvæðinu og Sjúkratrygginga Íslands, en sérgreinalæknar, sem fá greitt frá stofnuninni, eru flestir búsettir á höfuðborgarsvæðinu.
Samtals eru framlög aukin um 1,27 milljarð vegna uppbyggingu nýs Landsspítala, samkvæmt fjárlagafrumvarpinu. Þá eru aukin framlög til sjúkrahúsþjónustu Landsspítala og Sjúkrahússins á Akureyri samtals 8,56 milljarðar, þar af 200 milljónir sem fara í geðheilbrigðisdeildir sjúkrahúsanna tveggja og 45 milljónir að auki sem renna til barna- og unglingageðdeildar Landspítalans. Þá fær Landspítalinn 340 milljónir króna til reksturs jáeindarskanna, einn milljarð til viðhalds og viðgerða á húsnæði en á næsta ári bætast við 1,4 milljarðar til þeirra verka.
Í tilkynningunni segir einnig:
Til að bregðast við útskriftarvanda á Landspítala verður sérstök útskriftardeild á Landakoti fest í sessi með 330 milljóna króna framlagi. Enn fremur verða 50 milljónir króna veittar til að efla göngudeildarþjónusta spítalans. Nýja sjúkrahótelið á lóð Landspítalans við Hringbraut verður opnað á næsta ári og er fyrirsjáanlegt að með tilkomu þess styttist meðallegutími sjúklinga á spítalanum sem dragi úr álagi og þar með þeim útskriftarvanda sem við er að etja. Framlög til Vífilsstaða verða hækkuð um 170 milljónir króna til að styrkja rekstur deildarinnar og fjölga hjúkrunarrýmum fyrir aldraða sem bíða eftir útskrift af Landspítala.
Til tækjakaupa á sjúkrahúsum og heilbrigðisstofnunum verða veittar 517 milljónir króna, þar af 200 milljónir króna til heilbrigðisstofnana á landsbyggðinni. Landspítalinn fær jafnframt af þessari fjárhæð 225 milljóna króna tímabundna fjárveitingu til tækjakaupa fyrir brjóstamiðstöð á Landspítala.
Þjónusta við þolendur kynferðisofbeldis á landsbyggðinni verður efld með 20 milljóna króna auknu framlagi til neyðarmóttökunnar á Landspítalanum sem er merkt sérstaklega í þessu skyni.
Heilsugæsla og þjónusta utan sjúkrahúsa
Aukin framlög til heilsugæslu og annarrar þjónustu utan sjúkrahúsa nema 5,86 milljörðum króna samkvæmt fjárlagafrumvarpinu. Þar af verða framlög til heilsugæslunnar aukin um hálfan milljarð króna, meðal annars til að styrkja þverfaglega grunnþjónustu með aðkomu fleiri heilbrigðisstétta.
Geðheilbrigðisþjónusta utan sjúkrahúsa: Um 60 milljónir króna verða veittar heilsugæslunni á höfuðborgarsvæðinu til að fjölga sálfræðingum í samræmi við markmið geðheilbrigðisstefnu um að 9.000 íbúar séu að baki hverju stöðugildi sálfræðings í heilsugæslu. Þessu markmiði hefur þegar verið náð á landsbyggðinni. Sett verður á fót nýtt geðheilsuteymi á höfuðborgarsvæðinu og verða þau þar með tvö á höfuðborgarsvæðinu á næsta ári.
Skimun fyrir ristilkrabbameini hefst á næsta ári og renna til þess verkefnis um 70 milljónir króna. Byrjað verður að skima hjá aldurshópnum 60 – 69 ára en samkvæmt áætlun verður bætt við við nýjum aldurshópnum ár frá ári með auknum framlögum.
Tannlæknakostnaður aldraðra og öryrkja lækkar á næsta ári þar sem í fjárlagafrumvarpinu er ráðgert að verja um hálfum milljarði króna til að draga úr greiðsluþátttöku þeirra. Lækkun tannlæknakostnaðar hjá þessum hópum tekur gildi 1. júlí 2018.
Útgjöld til lyfjamála og innleiðing nýrra lyfja
Útgjöld til lyfjamála verða aukin um tæplega 5,4 milljarða króna. Þessi aukning er að mestu leyti til þess að mæta kerfislægum vexti og bregðast við vanáætlun útgjalda til málaflokksins í fjárlögum þessa árs. Jafnframt er skapað svigrúm til innleiðingar nýrra S-merktra lyfja og er áætlað að til þess renni um 700 milljónir króna.
Stefnumótun og stjórnsýsluumbætur
Mótun heilbrigðisstefnu verður sett í forgang og eru 40 milljónir merktar þeirri vinnu í fjárlagafrumvarpinu. Embætti landlæknis fær 250 milljónir króna í aukin framlög til að hraða vinnu við þróun rafrænnar sjúkraskrár á landsvísu til að auka gæði, öryggi og hagkvæmni innan heilbrigðiskerfisins.
