Unnur Brá Konráðsdóttir, fyrrverandi forseti Alþingis og þingmaður Suðurkjördæmis, segist nú íhuga að bjóða sig fram til borgarstjórnarkosninga. Þetta kemur fram á Vísi. Leiðtogakjör Sjálfstæðismanna fer fram 27. janúar næstkomandi, en opnað verður á framboð 27. desember og framboðsfrestur er tvær vikur. Kosið er um oddvita lista en síðan mun uppstillingarnefnd raða í sætin fyrir neðan. Unnur Brá datt af þingi í kosningunum í lok október og segir því hugmyndina hafa borið brátt að.

„Það er í skoðun. Það hafa ansi margir heyrt í mér varðandi þetta,“

sagði Unnur Brá við Vísi.

Unnur Brá færi því gegn Áslaugu Friðriksdóttur og Kjartani Magnússyni, sitjandi borgarfulltrúum Sjálfstæðisflokksins, en bæði hafa gefið út að þau sækist eftir því að leiða listann, en Halldór Halldórsson, núverandi oddviti Sjálfstæðisflokksins, hefur sem kunnugt er ákveðið að gefa ekki kost á sér áfram.

Aðrir sem nefndir eru líklegir til æðstu metorða í borginni eru þau Marta Guðjónsdóttir borgarfulltrúi, Borgar Þór Einarsson aðstoðarmaður utanríkisráðherra, Eyþór Arnalds, einn útgefanda Morgunblaðsins og Svanhildur Hólm Valsdóttir, aðstoðarmaður fjármálaráðherra.