Nýr snappari, Sara Mansour, er tuttugu ára stelpa sem ákvað að opna snapchattið sitt þegar hún komst að því að hún hefði hlotið inngöngu í úrvalsháskola í Kaíró, Egyptalandi.
„Mig langaði að leyfa fólki að fylgjast með þegar ég færi út í janúar og mögulega að nota snappið til að minnka fordóma í garð araba,“ segir Sara í samtali við Bleikt, en hún er á leiðinni til Kaíró síðar í mánuðinum.
„Egyptaland er glæsilegt land og fólkið sem býr þar er yndislegt, þó fjölmiðlar hafi ekki sýnt góða hluti af því upp á síðkastið.“ Sara er frekar nýlega búin að gera snappið sitt aðgengilegt öllum.
„Áhorfendafjöldinn fór fljótlega að aukast og mér fannst það vera kjörið tækifæri til að tala um hluti sem skipta mig máli og gætu haft fræðandi áhrif og verið skemmtilegir fyrir þá sem fylgjast með. Áður höfðu nokkrir sagt mér að ég ætti að vera snappari því ég er alltaf að lenda í einhverju vandræðalegu, svo snappið mitt er vonandi ekki of alvarlegt.“
Í dag ákvað Sara að tala um hluti sem skipta hana miklu máli, nefnilega streitu hjá unglingum – sérstaklega stelpum sem nota samfélagsmiðla mikið.
„Ég var að skrifa um þessa hluti í grein fyrir Framhaldsskólablaðið, en ég kannast vel þetta sjálf við enda var ég eingöngu 14 ára þegar ég fékk taugaáfall. Snappið fjallar hins vegar um tvöfeldni samfélagsmiðla og hvernig þeir þurfa ekki alltaf að endurspegla raunveruleikann. Ég vona að sem flestar ungar stelpur og konur sjái það.“
Við hvetjum lesendur til að fylgja Söru á Snapchat: saramansour96
Sjá meira frá Söru:
Pæling frá Söru um fóstureyðingar: „Skírlífi er ekki skiptimiði fyrir læknishjálp“
