Vinirnir og söngvararnir Friðrik Ómar og Jógvan Hansen stóðu fyrir tónleikaröð á skemmtistað sínum Græna herberginu fyrir jólin til styrktar Mæðrastyrksnefnd Reykjavíkur. Í morgun heimsóttu þeir Mæðrastyrksnefnd og afhentu Önnu Pétursdóttur formanni Mæðrastyrksnefndar og starfsfólki söfnunarféð. Alls söfnuðust 765.780 krónur en aðgangseyrinn á tónleikum þeirra rann óskiptur til nefndarinnar. Segir Friðrik Ómar:
„Fyrst og fremst vildum við vekja athygli á starfinu þeirra sem þær sinna allt árið um kring. Í desember er hvað mesta álagið á þeim þar sem allt að 1500 fjölskyldur leita til þeirra og því fannst okkur frábært að geta lagt þeim lið með þessum hætti fyrir jólin.Í morgun var að myndast röð fyrir utan húsnæði þeirra klukkustund fyrir auglýsta úthlutun. Við sáum því með berum augum hvursu mikilvægt starf þeirra er og þarft.„
Fv. Ásthildur Guðlaugsdóttir, Jógvan Hansen, Aðalheiður Frantzdóttir, Anna Pétursdóttir og Friðrik Ómar – Mynd/Eggert Jóhannesson
„Við vitum að þessi peningur kemur að góðum notum. Þær eiga mikið inni hjá okkur öllum. Það er magnað að heimsækja þær og kynna sér starfið. Það er bara svo frábært að hitta fólk sem gefur svona mikið af sér og gott að við getum eitthvað hjálpað til.”
