Monstri ehf. skrifaði undir dreifingarsamning í Japan fyrr á þessu ári og gaf í kjölfarið út bókina „The Skrimslis of Lavaland.“ Nú hefur bókin verið gefin út á íslensku og mun fyrirtækið halda útgáfuteiti í Hafnarborg Hafnarfirði þann 11. nóvember næstkomandi.
„Skrímslin hafa verið mjög vinsæl hjá ferðamönnum á Íslandi en útgáfa bókarinnar á íslensku er liður í því að vaxa meira á innlendum markaði. Með bókinni viljum við kynna skrímslin betur fyrir íslenskum börnum enda hafa skrímslin tengingu í íslenska arfleið og náttúru ásamt því að boða umhverfisvernd. Þannig fá börnin tækifæri til að kynnast þessum málefnum á skemmtilegan hátt,“ segir Alma Björk.
Í útgáfuteitinu verður skrímslasmiðja þar sem púsla má saman sínu eigin skrímsli. Á staðnum verður heilmikið úrval af efni svo börn sem fullorðnir geta fengið góða útrás fyrir sköpunarþörfina og gert sitt eigið einstaka skrímsli.
„Okkur finnst þetta virkilega spennandi og eitthvað sem okkur langar að bjóða uppá í framtíðinni, það er að fólk geti komið til okkar og gert sitt eigið skrímsli. Skrímslin urðu til þegar afgangar hlóðust upp frá framleiðslu á fatnaði og leitað var leiða í vöruþróun til að takmarka sóun efna. Með skrímslasmiðjunni viljum við leggja okkar af mörkum við takmörkun á hráefnavinnslu og nýta þannig afgangsefni og afklippur til þess að skapa virði, enda allt of mikil sóun sem á sér stað í dag,“ segir Alma Björk.
Útgáfuteitið verður í Hafnarborg í Hafnarfirði laugardaginn 11 nóvember frá kl. 12-16. Skrímslið Hellir mætir á svæðið ásamt Bjarna töframanni sem mun sjá til þess að partýið verði töfrum líkast. Það verður upplestur úr bókinni og svo geta þeir sem vilja búið til sitt eigið skrímsli.
