Myndband frá leik Stjörnunnar og Fjölnis í 3. flokki karla hefur vægast sagt vakið mikla athygli á samfélagsmiðlum og var það til umræðu í hlaðvarpinu Þungavigtin.
Leiknum lauk 1-7 en á myndbandinu má sjá Stjörnuna ítrekað gera Fjölni kleift að skora í opið mark þeirra þar sem markvörðurinn var sendur afar ofarlega á völlinn.
„Þetta er orðið þreytandi og við þurfum að útrýma svona gaurum úr fótboltanum, sem eru með einhverja svona stæla. Hvaðan kemur þessi vitleysa?“ sagði Mikael Nikulásson harðorður í Þungavigtinni og á hann þar væntanlega við þá sem leggja leiki svona upp.
„Þarna gefa Stjörnumenn Fjölni sex mörk í leik sem ég held að hafi verið nokkuð jafn, vegna þess að markvörður Stjörnunnar er alltaf uppi á miðju og inni í vítateig andstæðinganna. Hann er ekki í markinu. Ég heyrði það í gær að foreldrar í Stjörnunni væru gjörsamlega brjálaðir. Ég hef það frá mjög góðum heimildum.
Þjálfarar Stjörnunnar mega senda á mig hvað þetta sé ótrúlega flott, en þetta er bara viðbjóður. Þú munt aldrei græða á þessu, þú verður að vera með markmann í fótbolta,“ sagði hann enn fremur.
Myndbandið er hér að neðan, en um það sköpuðust jafnframt miklar umræður á samfélagsmiðlum.
3. flokkur Stjörnunnar að vinna með góða taktík pic.twitter.com/H0ilvcI8er
— Benedikt Björgvinsson (@benediktbjo) May 20, 2026
