79 ára gamall ellilífeyrisþegi í Leicester á Englandi var handtekinn, grunaður um morð og haldið í fangaklefa í 15 klukkustundir, áður en í ljós kom að hinn látni hafði ekki verið myrtur heldur látist vegna veikinda.

Bobby Carmichael segir að líf hans hafi orðið að martröð er hann og vinkona hans voru handtekin í kjölfar þess að vinkona tilkynnti um líkfund í almenningsgarðinum Castle Gardens í Leicester.

Vinkona Bobbys er 46 ára gömul. Þau voru á ferð í bíl hans þegar hún bað hann um að stöðva við garðinn því hún hefði glatað þar dúkku. Inni í garðinum fann hún hins vegar, auk dúkkunnar. látinn mann og tilkynnti líkfundinn til lögreglu. Á þeirri stundu vissu Bobby og vinkona hans ekki hver hinn látni var en síðar kom í ljós að um var að ræða gamlan vin Bobbys.

Bobby og vinkona hans fóru heim til til Bobbys eftir að hafa tilkynnt um líkfundinn en þar bankaði lögregluna á dyrnar um kvöldið, er parið sat inni í stofu og horfði á sjónvarpið. Voru þau bæði handtekin, grunuð um morð. Bobby sat í fangaklefa í 15 klukkustundir eða þar til rannsókn á líkinu leiddi í ljós að hinn látni hafði látist af sjúkdómi en ekki verið ráðinn bani.

Var þeim þá sleppt úr haldi og þau beðin afsökunar. Lögreglan í Leicester segir við fjölmiðla að aðgerðir í málinu hafi verið eðlilegar miðað við þær upplýsingar sem þá voru fyrirliggjandi.

Nánar má lesa um málið hér.