Við þekkjum eflaust öll týpuna sem notar „þefprófið“ til að kanna hvort hægt sé að nota handklæðið í eitt skipti enn (kannski notar þú þessa aðferð).  En hér kemur sannleikurinn um hversu oft á að þvo handklæði og sængurfatnað og því engin ástæða til að nota „þefprófið“ aftur.

Þetta er í raun eilífðar barátta. Ef þú þværð of oft, þá eyðileggurðu efnin. Ef þú þværð of sjaldan, þurrkar þú þér eða sefur í bakteríusprengju.

Sérfræðingarnir hjá Goodhouskeeping.com fjölluðu um þetta nýlega og komu með svörin sem okkur hefur greinilega vantað alla tíð!

Rúmið þitt er skítugra en þú heldur – Rúmið þitt er paradís fyrir húðfrumur, svita og rykmaura. Því þarf að skipta á því á hálfs mánaðar fresti.

En ef þú ert manngerðin sem svitnar mikið á nóttunni eða ef þú átt það til að fá þér miðdegisblund án þess að fara í bað áður, þá þarftu að skipta vikulega á rúminu.

Koddinn og sængin eru ekki undanþegin þvotti en góðu fréttirnar eru að það er nóg að þvo þetta tvisvar eða þrisvar á ári.

Hvað með handklæðin? – Margir nota sama handklæðið vikum saman en sérfræðingarnir segja að það þurfi að þvo þau þegar búið er að nota þau 3-4 sinnum.

Mundu líka að það á ekki að vöðla þau saman og setja í raka hrúgu. Það þarf að slétta þau alveg og hafa á stað þar sem er góð loftræsting.

Ef þú notar handklæðið við æfingar, þá þarf auðvitað að þvo það strax eftir það, nema þú sért manngerðin sem elskar lyktina af súrum líkamsræktarsvita.