Skuldir geta læðst inn í hversdagslífið eins og óboðinn gestur og breytt fjárhagslegum stöðugleika í áhyggjur og óróleika. Það skiptir ekki máli hvort maður er að glíma við kreditkortaskuldir, námslán eða húsnæðislán, þau eiga það öll sameiginleg að geta stressað okkur og pirrað.

Fjármálaráðgjafinn John Lowe segir að það sé hægt að komast út úr þessum erfiðleikum og skipulag og yfirsýn séu fyrsta skrefið á þeirri leið að sögn miðilsins Imna.

Flokkaðu lánin – Byrjaðu á að koma þér upp skýrri mynd af fjárhagslegum skuldbindingum þínum. Skrifaðu öll lán upp, stór og smá, og greiddu alltaf að minnsta kosti afborgunina af þeim. Síðan skaltu greiða aukalega inn á lánið, sem ber hæstu vextina, því það er skynsamlegast.

Hugsaðu þig vel um áður en þú færð peninga að láni – Ef þú ætlar að taka lán, þá skaltu skoða lánamarkaðinn vel áður. Gættu vel að afskriftum, sérstaklega ef þú ert að kaupa bíl, og veldu stuttan lánstíma.

Náðu stjórn á kreditkortaskuldinni – Ef kreditkortaskuldin er há, þá skaltu borga hana niður eins fljótt og þú getur og um leið draga úr kortanotkuninni með það að markmiði að nánast hætta að nota kreditkort.

Fáðu aðstoð fagfólks – Það eru alltaf til lausnir, líka í verstu tilfellunum. Gjaldþrotaáætlanir og endurskipulagning lána getur verið nauðsynleg og það má aldrei vanmeta ráð frá sérfræðingum að sögn Lowe.