Missy Bo Kearns, miðjumaður hjá Aston Villa, hefur opnað sig um afar erfiða reynslu eftir að hafa misst barn og fengið blóðeitrun.

Kearns, sem er 25 ára gömul og landsliðskona Englands, sagði í viðtali að hún hefði upplifað „fjóra daga af hreinu helvíti“ á sjúkrahúsi eftir að hafa misst fóstrið og veikst alvarlega af blóðeitrun í síðasta mánuði.

Hún og maki hennar, Liam Walsh hjá Luton Town, höfðu tilkynnt um þungun sína í byrjun mars, en aðeins nokkrum vikum síðar tók líf þeirra skyndilega dramatíska stefnu.

Kearns segir að læknir Aston Villa hafi líklega bjargað lífi hennar með því að senda hana tafarlaust á sjúkrahús eftir að hún kvartaði yfir flensulíkum einkennum.

„Ég hélt að þetta væru bara venjuleg einkenni meðgöngu. Þegar hitinn minn var mældur var hann 42 gráður og þá áttaði fólk sig á því að eitthvað var verulega að,“ sagði hún.

Á sjúkrahúsinu kom í ljós að hún hafði misst fóstrið og fengið blóðeitrun, sem getur verið lífshættuleg ef ekki er brugðist hratt við.

„Við fórum í gegnum þrjá til fjóra daga af hreinu helvíti á spítalanum. Ég held að við höfum ekki áttað okkur á því fyrr en síðar hversu mikið áfall þetta var,“ sagði hún.

Kearns sagði að á meðan hún glímdi við lífshættulega sýkingu hefði hugur hennar fyrst og fremst verið hjá missinum sjálfum.

„Ég var ekki einu sinni að hugsa um blóðeitrunina. Það eina sem ég hugsaði var: Ég hef misst barnið mitt.“

Hún segist enn vera að vinna úr áfallinu andlega, en vildi segja sögu sína opinberlega til að vekja athygli á hættum blóðeitrunar og mikilvægi þess að taka einkennum alvarlega.