Michael Carrick segir að enn sé óljóst hvenær skýrist hvort hann haldi starfi sínu sem aðalþjálfari Manchester United til frambúðar.

Carrick hefur stýrt liðinu tímabundið en verið orðaður við starfið til lengri tíma eftir ágætan árangur undanfarið. Hann segir þó að hann sé ekki að hugsa um tímamörk eða þrýsta á ákvörðun.

„Ég veit það ekki, ef ég á að vera hreinskilinn. Þetta er ekki eitthvað sem ég er að elta með einhverjum fresti,“ sagði Carrick.

Hann lagði áherslu á að einbeiting hans væri fyrst og fremst á liðið og árangur þess á vellinum. „Ég er hér til að hjálpa liðinu og félaginu að ná úrslitum. Okkur hefur gengið ágætlega en við getum enn bætt okkur.“

Carrick segir að hlutirnir muni skýrast þegar þar að kemur og að hann einblíni eingöngu á daglegt starf með liðinu.

Framtíð hans á Old Trafford er því enn óákveðin.