Dolly Martinez, sem kom fram í 10. þáttaröð raunveruleikaþáttanna My 600-Lb. Life, er látin aðeins 30 ára að aldri. Systir hennar, Lindsey Cooper, greindi frá andlátinu í færslu á samfélagsmiðlum um helgina.

Í tilkynningunni lýsti Lindsey systur sinni sem einstaklega hlýrri og kærleiksríkri manneskju sem hafði haft einstakt lag á að gleðja aðra.

„Dolly gat lýst upp hvaða herbergi sem var með hlátri sínum, góðvild og kærleika,“ skrifaði Lindsey meðal annars. Hún sagðist jafnframt finna huggun í því að systir hennar væri nú sameinuð föður þeirra.

Ekki hefur verið greint frá dánarorsök, en daginn áður hafði LIndsey sagt frá því að Martinez væri á sjúkrahúsi og væri að berjast fyrir lífi sínu.

Martinez vakti athygli í My 600-Lb. Life, þar sem fylgst var með baráttu hennar við matarfíkn og alvarlega offitu. Í þættinum kom fram að hún notaðist við viðbótarsúrefni og glímdi einnig við andlega vanlíðan.

Þrátt fyrir að hún hafi ekki fengið samþykki fyrir megrunaraðgerð í lok þáttarins náði hún engu að síður að léttast um 18 kíló frá upphafsþyngd sinni, sem var 268 kíló.

Raunveruleikaþættirnir My 600-Lb. Life fylgja eftir einstaklingum sem glíma við lífshættulega offitu yfir eins árs tímabil. Nokkrir þeirra sem hafa komið fram í þáttunum hafa því miður látist á undanförnum árum.

Þar á meðal var Larry Myers Jr., sem lést í júní 2023, þremur dögum eftir 49 ára afmæli sitt. Banamein hans var hjartaáfall.