Óveðrið hefur valdið víðtækum usla um landið. Tré hafa víða fokið eða fallið, vegir farið á kaf og samgöngur raskast verulega. Flestar ferjusiglingar liggja niðri og sumir skólar hafa verið lokaðir vegna aðstæðna.
Veðurofsinn er þó ekki það eina sem hefur sett svip sinn á Grikkland síðustu daga. Á eyjunni Krít, sem lengi hefur verið vinsæll áfangastaður meðal Íslendinga, var himinninn sveipaður óvenjulegum rauð-appelsínugulum lit í gær.
Orsökin var sandryk sem barst frá Sahara-eyðimörkinni og olli meðal annars töfum á flugi. Óhætt er að segja að rykið hafi sett bæði óvenjulegan og nokkuð drungalegan blæ yfir eyjuna.
Veðurstofa Grikklands varaði í dag við áframhaldandi mikilli úrkomu, þrumuveðri og jafnvel hagléli víða um landið. Rauð viðvörun hefur verið gefin út fyrir vestan- og sunnanverða Krít frá hádegi og fram á nótt.
