Stjóri Liverpool, Arne Slot, viðurkennir að yfirstandandi tímabil sé það erfiðasta sem hann hefur upplifað á ferlinum.
Tapið gegn Manchester City um helgina varð til þess að Liverpool er í sjötta sæti ensku úrvalsdeildarinnar og er nú fjórum stigum frá Meistaradeildarsæti.
„Við erum ekki að standa undir þeim væntingum sem gerðar eru til Liverpool. Leikmennirnir vita hver standardinn er og eru vonsviknir,“ segir Slot í aðdraganda leiksins við Sunderland í kvöld.
Slot tók við Liverpool sumarið 2024 af Jurgen Klopp og leiddi liðið strax til 20. Englandsmeistaratitilsins á sínu fyrsta tímabili. Í vetur hefur þó gengið mun verr þrátt fyrir 450 milljóna punda fjárfestingu í leikmenn í sumar.
„Ef við náum ekki Meistaradeildarsæti verður þetta ekki ásættanlegt tímabil,“ segir Slot enn fremur, ómyrkur í máli.
