Kristján Óli Sigurðsson segir að rosalegur launapakki sé ástæða þess að Birnir Snær Ingason sé mættur í KA. Hann skrifaði undir í dag og styrkir liðið gríðarlega í Bestu deildinni.

Rætt var um mál hans í Þungavigtinni í dag en þar segir að Birnir fái 10 milljónir í sinn vasa fyrir fjóra mánuði auk þess að meira komi til.

Hann kemur á láni frá Halmstad en samningur hans í Svíþjóð rennur út í Svíþjóð um áramót.

„Mega díll við KA, verður laus frá Halmstad eftir tímabil og þeir gefa hann frá sér. Hann semur við KA, 10 kúlur í vasann, alvöru sign on fee. Íbúð og bíll, þetta er 15 milljón króna pakki,“ segir Kristján Óli í Þungavigtinni og talaði um ráðherralaun.

Kristján segir að Víkingur hafi skoðað Birni en hann hafi dregið lappirnar í viðræðum og beðið um hærri laun en félagið vildi borga.

Birnir vakti verðskuldaða athygli fyrir framgöngu sína er hann lék með Víking og var meðal annars valinn besti leikmaður Bestu deildarinnar sumarið 2023 er Víkingar unnu tvöfalt en BIrnir skoraði 12 mörk og gaf 8 stoðsendingar í 25 deildarleikjum það sumarið. Þar áður lék hann með HK og Val auk uppeldisfélags síns Fjölni.

Birnir gekk í raðir sænska liðsins Halmstad í byrjun ársins 2024 en það árið gerði hann fjögur mörk í 26 deildarleikjum. Í ár hafa tækifærin verið færri.