Leikkonan Kate Backingsale gerði aðdáendur sína agndofa þegar hún deildi myndum af ketti sínum á Instagram í vikunni. Kötturinn er nefnilega bleikur og varla þarf að tilkynna lesendum það sérstaklega en kettir eru vanalega ekki bleikir og eins er fáheyrt að kettir láti lita á sér feldinn.

„Hver litar köttinn sinn bleikan? Þetta er ekki í lagi,“ skrifar einn aðdáandi í athugasemd og fleiri taka undir. DailyMail ræddi við talsmann kattavinasamtakanna Cats Protection sem fordæmdi bleika köttinn. „Kettir eru ekki skraut og við munum aldrei styðja það að fólk sé að lita feld þeirra. Líklega þykir köttum það streituvaldandi að láta lita sig og eins getur liturinn valdið ertingu og alltaf er hætt við því að kettir innbyrði litinn.“

Talsmaðurinn tók fram að það séu til mun betri leiðir til að eiga góða stund með ketti sínum, t.d. með því að snyrta feld þeirra eða hreinlega með því að leika við þá.

Beckinsale er einkum fræg fyrir vampírumyndirnar Underworld.