Fimleikaþjálfari, sem starfaði hjá Fimleikafélaginu Björk frá árinu 2022 út vorið 2024, stefndi félaginu fyrir dóm vegna meintra vangoldinna launa og orlofs.
Dómur í málinu féll í Héraðsdómi Reykjaness föstudaginn 20. júní.
Maðurinn krafðist rúmlega 577 þúsund króna frá félaginu auk málskostnaðar. Hluti af skuldinni var laun fyrir maí-mánuð 2024 en þá felldi félagið einhliða niður námskeið sem maðurinn átti að halda. Hann taldi að fimleikafélagið hafi þrátt fyrir niðurfellingu námskeiðsins verið skuldbundið til að greiða sér laun. Ennfremur krafðist maðurinn vangoldins orlofs og orlofsuppbótar fyrir tiltekin tímabil. Fimleikafélagið benti á að maðurinn hefði ekki lagt fram gögn til sönnunar því að hann hefði verið við störf hjá félaginu á umræddum tímum. Einnig vísaði fimleikafélagið í ákvæði í samningi sem þar sem segir að orlof skuli greitt samkvæmt unnum tímum.
Héraðsdómur Reykjaness féllst á allar kröfur mannsins. Í niðurstöðu dómsins segir meðal annars að það hafi ekki verið á ábyrgð þjálfarans að afla nægilega margra þátttakanda á námskeið sem hann átti að halda en námskeiðið var fellt niður vegna ónógrar þátttöku. Ennfremur segir í dómnum að félaginu hafi borið að standa að fullu skil á orlofsgreiðslum í samræmi við kjarasamninga. Orðrétt segir um þennan ágreining í niðurstöðu dómsins:
„Hvað orlof og orlofsuppbót varðar sérstaklega, þá hefur stefndi annars vegar vísað til þess að ekkert liggi fyrir um það að stefnandi hafi verið í ráðningarsambandi við stefnda á tímabilinu. Þá er á því byggt að aðilar hafi sérstaklega samið um að orlofsgreiðslur skyldu greiddar samkvæmt unnum tímum. Jafnframt hefur stefndi vísað til heimildar í 4. mgr. 7. gr. orlofslaga nr. 30/1987 sem feli í sér heimild til að greiða mánaðarkaupsmönnum orlofslaun á sama tíma og reglulegar launagreiðslur fara fram, enda sé meiri hluti þeirra því samþykkur.
Líkt og áður greinir liggja fyrir í málinu launaseðlar vegna umrædds tímabils og verður af þeim ekki annað ráðið en að stefnandi hafi sinnt launuðum störfum fyrir hið
stefnda félag á tímabilinu. Þá verður af fyrirliggjandi launaseðlum ekki ráðið að neytt hafi verið heimildar 4. mgr. 7. gr. orlofslaga við greiðslu og uppgjör orlofslauna.
Hefur stefndi ekki lagt fram önnur gögn til stuðnings sjónarmiðum sínum, svo sem ráðningarsamninga. Verður stefndi samkvæmt framansögðu og að virtum gögnum málsins að bera hallann af sönnunarkorti hvað þetta varðar.
Þá verður ekki fallist á að stefnandi hafi, með áðurnefndu ákvæði ráðningarsamnings aðila frá 5. febrúar 2024 er lýtur að fyrningu eldri áunninna réttinda, með bindandi hætti afsalað sér áunnum rétti sínum til orlofs og annarra lögbundinna greiðslna.
Með sama hætti leysir það stefnda ekki undan skyldu til greiðslu lögboðinna orlofsgreiðslna að stefnandi hafi ekki haft uppi kröfu þess efnis fyrr en með innheimtubréfi VR frá 12. júlí 2024. Verður því ekki fallist á sjónarmið stefnda í þá veru að krafa stefnanda hafi fallið niður vegna tómlætis.“
Var Fimleikafélagið Björk dæmt til að greiða þjálfaranum 577.603 með dráttarvöxtum auk 900 þúsund króna í málskostnað.
Dóminn má lesa hér.
