Minnst átta eru látin eftir loftbelgsslys í Brasilíu í gær. Flugmaður belgsins segir að eldur hafi komið upp í körfu belgsins, en þá ákvað flugmaðurinn strax að lækka flugið. Þegar belgurinn var kominn nærri jörðu bað flugmaðurinn farþega að stökkva frá borði.
„Þau byrjuðu að stökkva, en sumum tókst það ekki,“ segir flugsamgöngustofnun Brasilíu (Anac) og bætir við að þegar farþegar hafi yfirgefið belginn hafi hann tekið aftur á loft þar sem hann var nú léttari á sér. Loftbelgurinn hækkaði því flugið en hrapaði svo til jarðar þegar eldurinn hafði sprengt belginn.
Meðal þeirra látnu eru tvö pör, mæðgur, augnlæknir og listskautari. Þrettán lifðu slysið af, þar með talinn flugmaðurinn.
