Louis van Gaal, fyrrum, stjóri Manchester United, hefur baunað á félagið og vill meina að það sé ekkert í lagi á bakvið tjöldin hjá félaginu.

Van Gaal vorkennir þeim sem þurfa að þjálfa félagið í ljósi þess að það er stjórn félagsins sem ræður því hver kemur inn og hver kemur út fyrir hvert tímabil – í flest skipti.

Van Gaal segir að United sé enn aðeins að reyna að græða peninga frekar en að skila titlum þó að Sir Jim Ratcliffe sé nú orðinn meðeigandi félagsins og sér um flesta hluti sem tengjast knattspyrnurekstrinum.

,,Þetta er bara auglýsingafélag, ekki knattspyrnufélag. Ég hef sagt það áður og að vera í þeirri stöðu er erfitt,“ sagði Van Gaal.

,,Þegar stjórinn fær ekki að ráða því hvaða leikmaður kemur inn þá gerir það öllum erfitt fyrir – hann ætti að ráða því.“

,,Ef það gengur ekki upp þá verður hann rekinn, hann er ekki að skila réttum úrslitum. Þegar aðrir menn eru að stjórna því hvaða leikmenn eru keyptir þá skapar það bara vesen fyrir alla aðila.“