Christian Eriksen miðjumaður Manchester United og danska landsliðsins vill burt úr enska boltanum eftir nokkur ár.
Eriksen átti fyrst um sinn góð ár hjá Tottenham áður en hann fór til Inter.
Eftir hjartaáfall snéri hann aftur í enska boltann, fyrst með Brentford og svo með Manchester United síðustu þrjú árin.
„Það er ekkert klárt, það er áhugi út um allt en ég er ekki nálægt því að skrifa undir neitt,“ segir Eriksen en samningur hans við United rennur út næstu mánaðarmót.
„Ég ætla að spila þessa landsleiki og fara svo í gott sumarfrí, við sjáum hversu langt það frí verður.“
Hann vill ekki spila lengur á Englandi. „Ég vil fara burt úr enska boltanum, ég hef átt góða tíma þar en vil fara í eitthvað annað.“
„England hefur verið frábær staður fyrir mig og fjölskyldu mína, þegar ég fór til Inter þá var planið að fara ekki aftur til Englands.“
„Ég hef verið í þrjú og hálft ár síðan ég kom aftur. Maður veit aldrei en það er í forgangi hjá mér að fara annað.“
