Bruno Fernandes fyrirliði Manchester United er sterklega orðaður við Al-Hilal í Sádí Arabíu og hefur umboðsmaður hans fundað með félaginu.
Sádarnir vilja kaupa Bruno og gera hann að einum launahæsta leikmanni í heimi.
Bruno þarf að taka ákvörðun í vikunni en Al-Hilal vill fá Bruno með á HM félagsliða sem hefst um miðjan júní.
Bruno fór í gleðskap um helgina þar sem hann sást sitja með Joao Cancelo bakverði Al-Hilal og hefur það ýtt undir sögusagnir.
Cancelo er samlandi Bruno og var hann að fagna afmæli sínu þar sem Bruno mætti og gerði sér glaðan dag.
Það er talið nokkuð öruggt að þeir hafi rætt um lífið í Sádí Arabíu en Bruno þarf að svara Al-Hilal fyrir föstudag.
