FH tók á móti KR í stórleik í Bestu deild karla í kvöld. Gestirnir úr Vesturbænum byrjuðu leikinn af krafti og komust yfir með góðu skoti Gabríels Hrannars Eyjólfssonar á 5. mínútu. Heimamenn tóku hins vegar við sér og jafnaði Björn Daníel Sverrisson um tíu mínútum síðar. Jafnt var í hálfleik.
Snemma í seinni hálfleik fékk Björn Daníel beint rautt spjald fyrir groddaralega tæklingu en það sló FH-inga ekki út af laginu og komust þeir yfir á 58. mínútu. Þar var að verki Baldur Kári Helgason. KR átti eftir að taka völdin á vellinum á ný og skilaði það sér í jöfnunarmarki Eiðs Gauta Sæbjörnssonar þegar um stundarfjórðungur lifði leiks. Þarna stefndi flest í að gestirnir myndu finna sigurmarkið manni fleiri en allt kom fyrir ekki. Lokatölur 2-2. KR er því með þrjú stig eftir jafnmörg jafntefli í byrjun móts. Þetta er fyrsta stig FH í sumar.
Eftir jafntefli í fyrstu tveimur leikjum sínum vann Valur þægilegan sigur á KA á heimavelli sínum. Jónatan Ingi Jónsson skoraði tvö marka heimamanna og Tryggvi Hrafn Haraldsson eitt. Ásgeir Sigurgeirsson minnkaði muninn fyrir Akureyringa eftir um klukkutíma leik en nær komust þeir ekki. Valur er því með fimm stig en KA aðeins eitt.
Frábær byrjun Vestra heldur áfram og sigraði liðið ÍA í Akraneshöllinni í kvöld. Diego Montiel kom þeim yfir eftir hálftíma leik og tíu mínútum síðar tvöfaldaði hinn ungi og efnilegi Daði Berg Jónsson forystuna. Þetta reyndust einu mörk leiksins og 0-2 sigur Vestra staðreynd. Liðið er á toppi deildarinnar með 7 stig, en ÍA er með 3 stig.
