Yaya Toure, goðsögn Manchester City, neitar því að hann sé hættur í fótbolta þrátt fyrir sögusagnir um það.

Toure er 35 ára gamall í dag en hann yfirgaf gríska félagið Olympiakos í desember á síðasta ári.

Hann hefur síðan þá verið án félags en Toure ætlar ekki að leggja skóna á hilluna.

,,Það er enginn sem getur komið í veg fyrir það að ég spili fótbolta,“ sagði Toure.

,,Ég ákvað það að taka mér smá tíma fyrir sjálfan mig og það er mjög mikilvægt að skoða möguleikana vandlega.“

,,Þetta er ekki endirinn og ég er ekki hættur því ég trúi því að ég geti spilað í tvö eða þrjú ár til viðbótar.“