Andoni Iraola er sagður vera nálægt því að taka við Crystal Palace samkvæmt nýjustu fréttum frá Spáni.
Iraola, sem er 43 ára gamall, hefur vakið mikla athygli fyrir störf sín hjá Bournemouth og hefur verið orðaður við nokkur af stærstu félögum ensku úrvalsdeildarinnar, þar á meðal Manchester United, Liverpool og Chelsea.
Samkvæmt El Chiringuito er Palace nú komið lengst í viðræðum við spænska þjálfarann og hefur lagt fram freistandi tilboð fyrir sumarið.
Palace er að leita að nýjum knattspyrnustjóra þar sem Oliver Glasner mun láta af störfum í júní þegar samningur hans rennur út. Félagið hefur einnig verið tengt við Marcelino, þjálfara Villarreal, en Iraola er talinn efstur á óskalistanum.
Ef af ráðningunni verður myndi það teljast mikið afrek fyrir Palace, sem myndi þar með hafa betur í samkeppni við stærri félög um eftirsóttan þjálfara.
Á sama tíma bendir margt til þess að Manchester United muni halda Michael Carrick sem knattspyrnustjóra eftir góðan árangur hans á tímabilinu.
