Gary Neville telur að Manchester United þurfi að styrkja sig verulega í sumar og segir félagið þurfa að fá inn fjóra lykilleikmenn til að taka næsta skref.

United tryggði sér sæti í Meistaradeildinni með 3-2 sigri á erkifjendunum í Liverpool á sunnudag, en Neville segir að það breyti ekki því að hópurinn þurfi enn töluverða endurnýjun.

„Ég held að Manchester United þurfi vinstri bakvörð fyrir næsta tímabil því Luke Shaw hefur spilað hvern einasta leik á þessu tímabili og það gæti farið að segja til sín,“ sagði Neville í hlaðvarpi sínu.

Hann bætti við að liðið þyrfti einnig nýjan miðvörð og tvo miðjumenn. „Þetta eru fjórir algjörir forgangsstaðir hjá félaginu núna,“ sagði hann.

Neville nefndi jafnframt að ef félaginu tækist að losa sig við Mason Mount og fá fjölhæfari leikmann í staðinn gæti jafnvel komið til greina að bæta við fimmta leikmanninum.

Að mati Neville skiptir mestu máli að leikmennirnir sem komi inn verði af hæsta gæðaflokki.

„Þessir fjórir þurfa að vera alvöru toppleikmenn. Það er forgangsverkefnið hjá félaginu núna,“ sagði hann.