Leikmenn Rangers eru sagðir hafa misnotað hótelherbergi sem bókuð voru fyrir sjúkraþjálfun og endurhæfingu til að hitta konur og stunda með þeim kynlíf, samkvæmt heimildum skoskra miðla. Málið hefur vakið mikla athygli innan félagsins.

Samkvæmt fréttum hefur starfsmaður í sjúkraþjálfarateymi félagsins verið settur í tímabundið leyfi á meðan málið er skoðað. Talið er að atvikin hafi átt sér stað á hótelum í Englandi þar sem herbergi voru bókuð í tengslum við meðferð og endurhæfingu leikmanna.

Málið komst upp þegar eiginkona eins leikmanns komst að meintu framhjáhaldi. Hún á að hafa brugðist reið við og haft samband við yfirstjórn félagsins til að láta vita. Í kjölfarið rataði málið til læknateymis Rangers.

Ekki liggur fyrir hve margir leikmenn tengjast málinu né hversu lengi fyrirkomulagið hafi verið við lýði. Heimildir herma að um fámennan hóp hafi verið að ræða.

Samkvæmt heimildarmanni hafi málið, sem kom upp skömmu fyrir jól, valdið miklu fjaðrafoki innan félagsins. Herbergin hafi verið bókuð undir nafni sjúkraþjálfunardeildarinnar, en sumir leikmenn nýtt sér það í öðrum tilgangi.

Rangers hefur ekki gefið út opinbera yfirlýsingu um málið enn sem komið er. Málið er talið í innri skoðun hjá félaginu.