Kona að nafni Bruna Biancardi hefur komið ansi mörgum á óvart eftir ummæli sem hún lét falla í samtali við aðdáendur sína á Instagram.

Bruna er kærasta Neymar, leikmanns Santos í Brasilíu, en þau hófu samband sitt á ný í fyrra og eiga von á sínu öðru barni.

Neymar er markahæsti leikmaður í sögu brasilíska landsliðsins en hann hefur spilað fyrir lið eins og Paris Saint-Germain og Barcelona en er í dag í heimalandinu.

Bruna greindi frá því að hún og Neymar væru nú þegar búin að ganga í það heilaga og að þau séu í raun hjón frekar en kærustupar.

Þetta kom afskaplega mörgum á óvart en undanfarna mánuði hefur Neymar þó verið duglegur að kalla Bruna sína ‘eiginkonu’ frekar en kærustu.

Neymar var spurður út í mögulegt hjónaband undir lok síðasta árs og skellihló að þeirri spurningu og er ástæðan mögulega sú að hann sé nú þegar giftur.

Hjónin eiga saman eina stelpu sem ber nafnið Mavie sem fæddist árið 2023 en annað barn mun koma í heiminn á þessu ári.